Оскуола оҕолоро хабылыгы-хаамысканы баһылыыллар

«Модун” спорткомплекска оскуола оҕолоро саха төрүт оонньууларыгар хабылыкка-хаамыскаҕа күрэхтэстилэр. 12 улуустартан 109 кыттааччы түмсэн, саастарынан 8 бөлөххө арахсан, ким бастыҥын быһаарыстылар.

Күрэхтэһии кыттыылаахтарын Баһылай Манчаары аатынан спорт национальнай көрүҥнэргэ Киин дириэктэрэ Гаврил Мохначевскай, Саха Өрөспүүбүлүкэтин остуол оонньууларыгар Федерация президенэ Ольга Григорьева, сүрүн судьуйа Константин Ширяев эҕэрдэлээтилэр. Николаева Элеонора, Иванова Мария, Кетенев Владимир, Никифорова Наталья, Кармалах Розалия, Иванова Лариса, Данилова Ньургуйаана, Егорова Сусанна, Иванова Елизавета, Андросова Анжела судьуйаларынан эҥкилэ суох үлэлээтилэр.

Сүрдээх көхтөөх, интэриэһинэй тэрээһин буолла. Саастарынан аҕыс бөлөххө арахсан күрэхтэһээччилэр аҕыс остуолунан биир-тэҥҥэ оонньоотулар. Оҕолор сымсалара, түргэннэрэ, имигэстэрэ көрүөхтэн дьикти! Хабылыгы, хаамысканы сиргэ-буорга түһэрбэккэ ылыбыраччы ылаттыыллар. Өбүгэбит төрүт оонньууларын, чахчы баһылаабыттарын көрдөрдүлэр. Хамаанданан түмүккэ, Мэҥэ-Хаҥаластар бастаатылар, Дьокуускайтан *Модун* спорткомплекска дьарыктанар оҕолор иккис, Уус-Алданнар бириистээх үһүс миэстэлэри ылаттаатылар.

            Кыайыылаах хамаанданы Тиэлиги орто оскуолатыгар дириэктэри иитэр үлэҕэ солбуйааччы Екатреина Николаевна Попова салайан аҕалбыт:

-“Кыайыы кэлэрэ уустук. Үөһээ-Бүлүүлэр, Сунтаардар, Намнар, Дьокуускай куорат «Модун» олус үчүгэй бэлэмнээх оҕолору аҕалбыттар. Ситиһии - күүстээх дьарык, үлэ түмүгэ. Биһиги улууспутугар сүүмэрдиир күрэхтэһиилэри кыайаммыт, бастыҥ оҕолорбут кэлэн күрэхтэстилэр. Тиэлиги нэһилиэгиттэн Алексеева Аэлита, Захаров Ян, Майа лицейиттэн Антипин Андрей, бары да үчүгэйдик оонньоотулар. Биһиэхэ хабылыгынан-хаамысканан элбэх оҕо оонньуур. Сүрдээҕин сайдан иһэр. Улахан дьоммут хамаандата өрөспүүбүлүкэҕэ үстэ бастаабыттара. Оҕолору детсадтан саҕалаан дьарыктаан эрэбит. Сааһырбыттарга доруобуйаларын бөҕөргөтөллөрүгэр табыгастаах көрүҥ. Оҕо өй-санаа, эт-сиин өттүнэн сайдарыгар олус туһалаах. Ол курдук, үөрэхтэригэр көмөлөөх, үөрэнээччилэр буочардара тупсар, детсад оҕолоро моторикалара сайдар, илииҥ, тарбахтарын былчыҥнара сайдаллар. Түргэн хамсаныылаах, толкуйдаах буолаллар».

10-11 саастаахтарга Богдан Журавлев (Модун), Аэлита Попова (Дьокуускай), 12-13 саастаахтарга Ян Захаров (Мэҥэ-Хаҥалас), Аэлита Алексеева (Мэҥэ-Хаҥалас), 14-15 сс. Ньургун Семенов (Ньурба), Ая Давыдова (Модун), 16-18 сс. Герман Игнатьев (Сунтаар), Ирина Новгородова (Модун) бастаатылар.

Уолаттарга Үөһээ-Бүлүүтэн Махаров Алексей, кыргыттарга Уус-Алдан улууһун Баатаҕайын 11 кылааһын үөрэнээччитэ Вилена Дмитриева Саха Өрөспүүбүлүкэтин абсолютнай чөмпүйүөнүн үрдүк аатын ыллылар: -«Мин дьарыктаммытым түөрт сыл буолла. Биһигин тренербит Николай Адамович Николаев дьарыктыыр. Тренербэр махтанабын. Биһи Баатаҕайдар күрэхтэһиилэргэ инники күөҥҥэ сылдьааччыбыт. Төбөҕүн, мэйиигин, тарбахтаргын сайыннарар. Бүгүн, бэйэм санаабар, соччото суох оонньоотум. Долгуйаммын сыыһа-халты хамсаныылары оҥортоотум. Бэйэҕэр эрэллээх буолуоххун наада. Олус умсугутуулаах, үчүгэй көрүҥ. Дьиэҕэр, спортивнай саалаҕа, ханна баҕарар дьарыктаныаххын сөп. Төһөнөн дьарыктанаҕын да, ситиһии кэлэр».

Эһиил, 2021 сыл сайыныгар, Горнай улууһун Бэрдьигэстээҕэр буолар «Баһылай Манчаары ооннььууларыгар» оҕолорго бэртээхэй бэлэмнэнии түһүлгэтэ буолла.

 

Саха Өрөспүүбүлүкэтин физическэй культураҕа уонна спорка

пресс-сулууспата