КЭРИЭСТИИБИТ СЭРИИ ХОНУУТУГАР ДЬОРУОЙДУУ ОХТУБУТ АЛБАН ААТТААХ БУОЙУННАРЫ
Аҕа дойдуну көмүскүүр Улуу сэрии биэс сылын устатыгар Саха АССР сири оҥорууга наркоматын аппараатыттан Кыһыл Аармыйа кэккэтигэр барыта 64 үлэһит ыҥырыллан барбыта. Кинилэртэн 10 буойун Улуу Кыайыыны түстүүр кыырыктаах кыргыһыыларга сырдык тыыннара быстыбыта. Ол кэлэр көлүөнэлэр эйэлээх олоххо дьоллоохтук олороллорун, айымньылаахтык үлэлииллэрин-хамныылларын, оҕону-ыччаты тэнитэллэрин туһугар бүтүн олохторун толук уурбуттар, сэрии хонуутугар дьоруойдуу охтубуттар өлбөөдүйбэт үтүө ааттара бу бааллар:
АВДЕЕВ ВАЛЕРИАН ФЕДОРОВИЧ – 1912 сыллааҕы төрүөх, омугунан нуучча, наркомат коменданынан үлэлии олорон 1941 сыллаахха балаҕан ыйын 8 күнүгэр Дьокуускай куорат военкоматынан сэриигэ ыҥырыллыбыта. Хорсуннук сэриилэһэ сылдьан 1942 сыл кулун тутар ый 7 күнүгэр кыргыһыы хонуутугар охтубута, кини көмүс уҥуоҕа Ленинградскай уобалас Киримскэй оройуонугар Бор диэн дэриэбинэҕэ көтөҕүллүбүтэ. (“Өйдөбүнньүк” 1-кы кинигэтэ, Дьокуускай к., 1992 с.).
АЛЕКСЕЕВ ДМИТРИЙ НИКОЛАЕВИЧ – 1921 сыллаахха Хаҥалас оройуонугар Малдьаҕар нэһилиэгэр төрөөбүт саха. Наркомакка куонньугунан үлэлии сылдьан 1942 сыллаахха бэс ыйыгар куорат военкоматынан сэриигэ ыҥырыллыбыта. Сэриилэһэр фроҥҥа тиийээт даҕаны, 1942 сыл сэтинньи ый 28 күнүгэр, сэрии хонуутугар дьоруойдуу охтубута. Тверь уобалаһын Молодотудскай оройуонугар Поздняково диэн дэриэбинэҕэ көмүллүбүтэ. (“Өйлөбүнньүк” 1-кы кинигэтэ, Дьокуускай к.,1992 с.)
БАРАШКОВ ЗАХАР СПИРИДОНОВИЧ – 1912 сыллаахха Чурапчы оройуонугар Алаҕар нэһилиэгэр төрөөбүт саха. Наркомат холкуоһунай-тэрийэр отделын инструкторынан үлэлии сылдьан Дьокуускай куорат военкоматынан сэриигэ ыҥырыллыбыта. 1942 сыллаахха балаҕан ыйыгар сэрии хонуутугар сырдык тыына быстыбыта биллэр, хомойуох иһин ханна харайыллыбыта биллибэт. (“Өйдөбүнньүк” 1-кы кинигэтэ, Дьокуускай к.,1992 с.).
ВЕРЕЩАГИН ВАЛЕНТИН АНДРЕЕВИЧ – 1912 сыллааҕы төрүөх, омугунан нуучча, наркомат бырайыактыыр-сметнай бөлөҕүн салайа олорон сэриигэ 1941 сыллаахха Дьокуускай куорат военкоматынан ыҥырыллыбыта. Фроҥҥа гвардия ыстаарсай лейтенана званиелаах сылдьан, 1943 сыл от ыйын 13 күнүгэр ыарахан бааһыран госпиталга өлбүтэ. Белгородскай уобалас Прохоровскай оройуонугар Камышевка диэн дэриэбинэҕэ көмүллүбүтэ. (“Өйдөбүнньүк” кинигэ, Дьокуускай к., 1992 с.)
ДУБИНИН ТИМОФЕЙ АЛЕКСЕЕВИЧ – 1910 сыллаахха Иркутскай уобалас Черемхово куоратыгар төрөөбүт нуучча. Наркомакка холкуоһунай-тэрийэр отдел начальнига этэ. 1941 сыллаахха Дьокуускай куорат военкоматынан сэриигэ ыҥырыллан баран түөрт сыл устата хорсуннук сэриилэспитэ. Лейтенант званиелаах 1819-с самоходнай-артиллерийскай пуолкаҕа хамандыырынан сэриилэһэ сылдьан ыараханнык бааһырбыта, 1945 сыл муус устар ый 23 күнүгэр госпиталга эмтэнэ сытан сырдык тыына быстыбыта. Германияҕа, Померания сиригэр Нипервизе-Фиддихов диэн сиргэ көмүллэ сытар. (“Өйдөбүнньүк” 3-с кинигэтэ, Дьокуускай к.,1995 с.).
КОЛЕСНИКОВ ВАСИЛИЙ ИВАНОВИЧ – 1920 сыллааҕы төрүөх, нуучча, наркомат оттукка сиэктэрин салайааччытынан үлэлии олорон Дьокуускай куорат военкоматынан сэриигэ ыҥырыллыбыта. Младшай лейтенант званиеланан 17 стрелковай дивизия 1319 стрелковай пуолкатын взводун хамаандалаан хааннаах хапсыһыыларга харса суох киирсэ сылдьан, 1942 сыллаахха балаҕан ыйын 3 күнүгэр дьоруойдуу охтубута, өлүгэ Смоленскай уобалас Темкинскэй оройуонугар Балмасово селоҕа харайыллыбыта. (“Өйдөбүнньүк”, 2-с кинигэ, Дьокуускай к.,1993 сыл).
КОНОНОВ ИВАН ВАСИЛЬЕВИЧ – 1909 сыллаахха Дьокуускай куоракка төрөөбүтэ. Сортсемовощ пуунун управляющайынан үлэлии сылдьан 1942 сыллаахха Дьокуускай куорат военкоматынан фроҥҥа ыҥырыллыбыта. Улахан хаан тохтуулаах кыргыһыыга хапсыһа сылдьан ыараханнык бааһырбыта, 1945 сыллаахха олунньу ый 2 күнүгэр медсанбакка араанньытын эмтэтэ сытан сырдык тыына быстыбыта. Көмүллүбүт сирэ биллибэт. (“Өйдөбүнньүк” 3-с кинигэтэ, Дьокуускай к.,1995 сыл.).
ОКОЕМОВ СЕМЕН АФАНАСЬЕВИЧ – 1920 сыллаахха Уус Алдан оройуонугар II Курбуһах нэһилиэгэр төрөөбүт саха. Наркомакка куонньугунан үлэлии сылдьан Чурапчы оройуонун военкоматынан сэриигэ ыҥырыллыбыта. 1943 сыллаахха бэс ыйыгар сэрии хонуутугар охтубута эрэ биллэр, ханна, хаһан көмүллүбүтэ өссө да чуолкайдана илик. (“Өйдөбүнньүк” 3-с кинигэтэ, Дьокуускай к., 1995 с.).
ПЕТРОВ АНДРЕЙ НИКОЛАЕВИЧ – Кэбээйи оройуонугар 1913 сыллаахха төрөөбүт саха ыччата, наркомат землеустройство отделын кылаабынай инженеринэн үлэлээбитэ. Сэриигэ Дьокуускай куорат военкоматынан ыҥырыллыбыта. 245 гвардейскай стрелковай пуолка састаабыгар сэриилэһэ сылдьан 1943 сыллаахха атырдьах ыйын 16 күнүгэр кыргыһыы хонуутугар дьоруойдуу охтубута. Брянскай уобалас Карачевскай оройуонугар Емельяновка бөһүөлэгэр (Бурды дэриэбинэҕэ) көмүллэ сытар. (“Өйдөбүнньүк”, 2-с кинигэ, Дьокуускай к.,1993 с.).
СВИСТУНОВ НИКОЛАЙ ПЕТРОВИЧ – 1894 сыллаахха Дьокуускай куоракка төрөөбүт нуучча. Наркомат холкуостарга оҥоһуллар докумуоннарын эппиэттээх толооччутунан үлэлии олорон Дьокуускай куорат военкоматынан сэриигэ ыҥырыллыбыта. 376 стрелковай пуолк саллаатынан кыргыһа сылдьан ыараханнык бааһырбыта. Ол ылбыт бааһыттан өрүттүбэккэ сырдык тыына быстыбыта, көмүс уҥуоҕа Тверь уобалаһын Луковицковскай оройуонугар Аполево диэн дэриэбинэҕэ көтөҕөллүбүтэ. (“Өйдөбүнньүк” 2-с кинигэтэ, Дьокуускай к.,1993 с.).
