Александр Атласов: Сайылыкка көһүү дириҥ суолталаах, күүтүүлээх кэм
Саха сирин ытыктабыллаах олохтоохторо,
чуолаан тыа хаһаайыстыбатыгар быһаччы үлэлии-хамсыы, оҥорон таһаарыынан ылсан дьарыктана сылдьар ытык дьоммут, бэтэрээннэр!
Өрөспүүбүлүкэ тыатын хаһаайыстыбатын министиэристибэтин уонна тус бэйэм ааппыттан эһигини барыгытын быйылгыттан саҕалаан Аҕа баһылык анал ыйааҕынан биллэриллибит Сайылык күнүнэн, самаан сайыммыт саҕаланар Ньукуолунунан, ис сүрэхпититтэн итиитик-истиҥник эҕэрдэлиибин!
Бу күн өбүгэлэрбит өйдөбүллэринэн, Сахабыт сиригэр Саҥа сыл саҕаланар. Оттон сылы этэҥҥэ туораан, күөххэ үктэнии, сайылыкка көһүү дириҥ суолталаах, күүтүүлээх кэм. Мантан инньэ унньуктаах уһун кыһыны этэҥҥэ туораан, сырдыкка эрэл улаатар, биир күн бүтүн дьылы аһатар эппиэттээх кэмнэрэ үүннэллэр. Сайылык күнэ – биһиэхэ үтүмэн үйэлэри уҥуордаан илдьэ кэлбит саха омугун үгэһин үйэтитии, тыа сирин туруу үлэһит киһитин өрө тутар, инники күөҥҥэ таһаарар сырдык сыаллаах.
Үлэҕитин-хамнаскытын ымпыгар-чымпыгар диэри былааннаан, оҥорон таһаарыы көдьүүстээх, үтүө түмүктээх буолуутун ситиһэн, аахсар дохуоккут үрдүөхтүн! Өрөспүүбүлүкэҕэ эрэ буолбакка, дойду үрдүнэн биир үрдүкү көрдөрүүлээх хаһаайыстыба буола сайдаргытыгар баҕарабын.
Томороон тымныылаах, өҥүрүк куйаастаах төрөөбүт ойдубутугар саханы саха дэппит хороҕор муостаах сырыырҕыырыгар, үүт үрүйэни үрүлүтэ сүүрдэргэ, тыа хаһаайыстыбатын араас хабааннаах үлүскэннээх үлэтэ саҥа таһымҥа тахсарыгар уурар ахсаабыт кыһамньыгытын, үрдүктүк сыаналаан туран, барҕа махталбытын тиэрдэбит.
Эһиги уустуктан иҥнибэт, күүстээх санааҕыт, үлэҕэ бэриниигит түмүгэр Саха сирин курдук уустук уонна ураты усулуобуйатыгар эт-үүт бэлэмнэнэр, олохтоох оҥорон таһаарыы салгыы улаатарыгар эрэл үөскүүр. Эдэр көлүөнэ төрөөбүт дойдуга бэриниилээх буолуутугар, үлэтин өрө тута үөрэнэригэр үтүө холобур Эһиги буолаҕыт! Кэнэҕэһин да Сахабыт сирэ чэчирии сайдарыгар, эрэгийиэн экэниэмикэтэ тупсарыгар эһиги киллэрэр кылааккыт, кыттыыгыт дьоһуннаах буоларыгар саарбахтаабаппыт.
Бэйэбит өттүбүтүттэн туһааннаах өйөбүлү оҥорон, кииҥҥэ тиийэ туруорсан, хайа кыалларынан тыа сирэ куораттан итэҕэһэ суох сайдыылаах, оҥорон таһаарыы улаатан иһэригэр кыһаныахпыт. Сайылыктааһыҥҥа улахан болҕомто туһаайыллыа. Уостубат уйгулаах, быстыбат быйаҥнаах үтүөкэн олоҕу, хас биирдиигитигэр ыарыыга-дьаҥҥа ылларбат кытаанах доруобуйаны, сиэтиллэн, элбээн иһэр ситиһиилэри, кыайыылары баҕарабын!
СӨ Тыа хаһаайыстыбатын миниистирэ Александр Атласов
